মুখ্য পৃষ্ঠা
06/04/25
14:22
আন্ধাৰ কোঠাত শব্দ বিচাৰি
তোমাৰ মৃত্যুৰ দিনা
এটি আন্ধাৰ কোঠাত ৰৈ
তোমাক চিৰবিদায় দিছিলো |
বিচাৰি লৈছিলো এটা কলম
শেষ চিঠিখনি লিখাৰ আশাত |
সময়ে নাজানে ,
কত প্ৰেমিকৰ নীলা খামৰ চিঠি
চোলাৰ জেপত ভাজ হৈ থাকে |
নুবুজে প্ৰেয়সীয়ে ,
কিমান মৰমে চিঠিৰ জাপত হাহাকাৰ
কৰে |
আন্ধাৰ কোঠাত শব্দ বিচাৰি
ভাগৰি যোৱা মই সৰ্বহাৰা প্ৰেমিক |
মকৰা জালত বন্দী হৈছিল প্ৰাপ্তি |
অপ্ৰাপ্তিত গজি উঠিছিল বুকুত
বিষাদৰ এটি এটি গজালি |
চিগাৰেটৰ ধুঁৱাই আন্দোলন কৰিছিল ,
উকা কাগজত লিখা নহ'ল
তোমালৈ এপিটাফ |
অঁকা নহ'ল তোমাৰ ছবি |
পৃষ্ঠাৰ দেৱাল পাৰ হৈ
মাথোঁ বৈ গ'ল দুধাৰি চকুলো |
নাম দিয়া নহ'ল কবিতাত
আধৰোৱা প্ৰেমৰ ইলিজি |
প্ৰেমৰ মৃত্যু নহয় বাবেই
কঁপি কঁপি জ্বলি উঠিছিল
তুলসী তলত এগচি চাকি |
হাত জোকাৰি বিদায় দিবলৈ ,
পোহৰ
তথাপি বিচাৰি পোৱা নাছিলো |
হেঁপাহৰ ছবি খন ,
দুহাতেৰে ফালি চিৰাচিৰ কৰিলো |
শব্দ বিচাৰি অন্ধকাৰ কোঠাত ,
নিজকে কলংকিত কৰিলো |
মৰম হ'ল এটি শব্দ নহয় ,
প্ৰেমাষ্পদ....
থমকি ৰলো হতাশাত ,
আন্ধাৰ কোঠাত শব্দ বিচাৰি |
© ৰাজু কলিতা
23/08/14
